hamein bhi kyun na ho dawa ki hum bhi yakta hain

hameñ bhī kyuuñ na ho da.avā ki ham bhī yaktā haiñ

hamāre ḳhuun ke pyāse jab ahl-e-duniyā haiñ

bas is ḳhatā pe ki pahchānte haiñ kyuuñ sab ko

ye sāhibān-e-nazar shahr bhar meñ rusvā haiñ

ham ahl-e-dil kā zamāna hī saath de na sakā

hameñ bhī dukh hai ki ham is safar meñ tanhā haiñ

hameñ na jaano faqat Dūbtā huā lamha

hameñ yaqīñ hai ki ham hī nishān-e-fardā haiñ

miTā sakegī hameñ kyā koī siyah-baḳhtī

ham apnā jism bhī haiñ ham hī apnā saayā haiñ

hameñ pukār na ab ai arūs-e-shabnam-o-gul

hameñ na DhūñDh ki ham be-kanār sahrā haiñ

sadā-e-sāz nahīñ ham-navā-e-ġham hī sahī

hameñ suno ki hameñ e'tibār-e-naġhma haiñ

hamein bhi kyun na ho dawa ki hum bhi yakta hain

hamare KHun ke pyase jab ahl-e-duniya hain

bas is KHata pe ki pahchante hain kyun sab ko

ye sahiban-e-nazar shahr bhar mein ruswa hain

hum ahl-e-dil ka zamana hi sath de na saka

hamein bhi dukh hai ki hum is safar mein tanha hain

hamein na jaano faqat Dubta hua lamha

hamein yaqin hai ki hum hi nishan-e-farda hain

miTa sakegi hamein kya koi siyah-baKHti

hum apna jism bhi hain hum hi apna saya hain

hamein pukar na ab ai arus-e-shabnam-o-gul

hamein na DhunDh ki hum be-kanar sahra hain

sada-e-saz nahin ham-nawa-e-gham hi sahi

hamein suno ki hamein e'tibar-e-naghma hain