hamein chaar samt ki dauD mein wahi gard-e-baad-e-sada mila

hameñ chaar samt kī dauḌ meñ vahī gard-e-bād-e-sadā milā

bane apnī zaat meñ guuñj ham na ḳhudī milī na ḳhudā milā

kabhī shahr shahr ḳhirad phirī kabhī dasht dasht junūñ gayā

mirī zindagī mujhe kuchh batā tujhe kyā milā mujhe kyā milā

use DhūñDte the jo kū-ba-kū vo safar kī gard meñ aT ga.e

kise rāh-e-nik.hat-e-gul milī kise naqsh-e-pā-e-sabā milā

sar-e-sat.h-e-reg likhī huī koī dāstān-e-junūñ milī

sar-e-lauh-e-āb banā huā koī naqsh-e-kār-e-vafā milā

kise haal apnā sunā.eñ ham kise shauq apnā batā.eñ ham

koī ham-safar hai zamīn kā koī ham-rikāb-e-havā milā

kabhī koī aañkh to bhīgtī kabhī koī dil to pasījtā

mire shauq-e-tāza-navā.ī ko ye navā-garī kā salā milā

mirī band aañkh pe vā hue ka.ī dar tilism-e-ḳhayāl ke

mujhe niiñd aa.e to kis tarah mujhe ḳhvāb-e-ahd-fazā milā

maiñ shajar huuñ mausam-e-dard kā yahī rut hai mere liye sadā

kabhī shāḳh shāḳh harī milī kabhī barg barg judā milā

yahī raushnī mire haath hai yahī tāzgī mire saath hai

kabhī koī daaġh chamak uThā kabhī koī zaḳhm nayā milā

maiñ chalā thā shahr kī raah se magar apnī zaat meñ gum huā

mujhe 'bāqar' apnī talāsh thī mujhe aaj apnā patā milā

hamein chaar samt ki dauD mein wahi gard-e-baad-e-sada mila

bane apni zat mein gunj hum na KHudi mili na KHuda mila

kabhi shahr shahr KHirad phiri kabhi dasht dasht junun gaya

meri zindagi mujhe kuchh bata tujhe kya mila mujhe kya mila

use DhunDte the jo ku-ba-ku wo safar ki gard mein aT gae

kise rah-e-nikhat-e-gul mili kise naqsh-e-pa-e-saba mila

sar-e-sath-e-reg likhi hui koi dastan-e-junun mili

sar-e-lauh-e-ab bana hua koi naqsh-e-kar-e-wafa mila

kise haal apna sunaen hum kise shauq apna bataen hum

koi ham-safar hai zamin ka koi ham-rikab-e-hawa mila

kabhi koi aankh to bhigti kabhi koi dil to pasijta

mere shauq-e-taza-nawai ko ye nawa-gari ka sala mila

meri band aankh pe wa hue kai dar tilism-e-KHayal ke

mujhe nind aae to kis tarah mujhe KHwab-e-ahd-faza mila

main shajar hun mausam-e-dard ka yahi rut hai mere liye sada

kabhi shaKH shaKH hari mili kabhi barg barg juda mila

yahi raushni mere hath hai yahi tazgi mere sath hai

kabhi koi dagh chamak uTha kabhi koi zaKHm naya mila

main chala tha shahr ki rah se magar apni zat mein gum hua

mujhe 'baqar' apni talash thi mujhe aaj apna pata mila