hamein dawa tha dekhenge wo kyunkar yaad aate hain

hameñ dā'vā thā dekheñge vo kyūñkar yaad aate haiñ

rag-e-jāñ ban ga.e haiñ ab fuzūñ-tar yaad aate haiñ

ḳhafā to mujh se rahte haiñ magar rahte haiñ dil meñ bhī

maiñ aksar bhūltā huuñ aur vo aksar yaad aate haiñ

butoñ kī bandagī hai shukriya sāne' kī san'at kā

vo kāfir kyoñ huā jis ko ye dilbar yaad aate haiñ

mirā maazī nazar aayā mujhe hāl-e-hasīñ ho kar

jo un ke saath dekhe the vo manzar yaad aate haiñ

maiñ gulchīñ thā bahār-e-zindagī ke gulsitānoñ kā

jo din phūloñ meñ biite the vo aksar yaad aate haiñ

nasha utrā magar ab bhī tumhārī mast āñkhoñ se

piye the jo mai-e-ulfat ke sāġhar yaad aate haiñ

dayār-e-dūr meñ maiñ to nahīñ aatā huuñ yaad un ko

na jaane vo mujhe phir kyoñ barābar yaad aate haiñ

bas ab rahne bhī de sab be-niyāzī dekh lī terī

tujhe ab to vo har maz.har meñ 'az.har' yaad aate haiñ

hamein da'wa tha dekhenge wo kyunkar yaad aate hain

rag-e-jaan ban gae hain ab fuzun-tar yaad aate hain

KHafa to mujh se rahte hain magar rahte hain dil mein bhi

main aksar bhulta hun aur wo aksar yaad aate hain

buton ki bandagi hai shukriya sane' ki san'at ka

wo kafir kyon hua jis ko ye dilbar yaad aate hain

mera mazi nazar aaya mujhe haal-e-hasin ho kar

jo un ke sath dekhe the wo manzar yaad aate hain

main gulchin tha bahaar-e-zindagi ke gulsitanon ka

jo din phulon mein bite the wo aksar yaad aate hain

nasha utra magar ab bhi tumhaari mast aankhon se

piye the jo mai-e-ulfat ke saghar yaad aate hain

dayar-e-dur mein main to nahin aata hun yaad un ko

na jaane wo mujhe phir kyon barabar yaad aate hain

bas ab rahne bhi de sab be-niyazi dekh li teri

tujhe ab to wo har mazhar mein 'azhar' yaad aate hain