hamein dekhe se wo jita hai aur hum us pe marte the

hameñ dekhe se vo jiitā hai aur ham us pe marte the

yahī rāteñ thiiñ aur bāteñ thiiñ vo din kyā guzarte the

vo soz-e-dil se bhar laatā thā ashk-e-surḳh āñkhoñ meñ

agar ham jī kī bechainī se āh-e-sard bharte the

kisī dhaḌke se rote the jo bāham vasl kī shab ko

vo ham ko man' kartā thā ham us ko man' karte the

milī rahtī thiiñ āñkheñ ġhalba-e-ulfat se aapas meñ

na ḳhauf us ko kisī kā thā na ham logoñ se Darte the

so ab sad-haif us ḳhurshīd-rū ke hijr meñ 'jur.at'

yahī rāteñ haiñ aur bāteñ haiñ vo din kyā guzarte the

hamein dekhe se wo jita hai aur hum us pe marte the

yahi raaten thin aur baaten thin wo din kya guzarte the

wo soz-e-dil se bhar lata tha ashk-e-surKH aankhon mein

agar hum ji ki bechaini se aah-e-sard bharte the

kisi dhaDke se rote the jo baham wasl ki shab ko

wo hum ko man' karta tha hum us ko man' karte the

mili rahti thin aankhen ghalba-e-ulfat se aapas mein

na KHauf us ko kisi ka tha na hum logon se Darte the

so ab sad-haif us KHurshid-ru ke hijr mein 'jurat'

yahi raaten hain aur baaten hain wo din kya guzarte the