ہمیں ہارا نہیں سمجھو کہ ہم دلگیر آئے ہیں

ہمیں ہارا نہیں سمجھو کہ ہم دلگیر آئے ہیں

کمانیں تھیں کہیں پر اور کہیں سے تیر آئے ہیں

نظر بھر دیکھ لو ہم آج تکمیل تمنا میں

تمہارے رو بہ رو پہنے ہوئے زنجیر آئے ہیں

یہ سر حاضر ہے میرا گر سلامت آپ رہ جائیں

وگرنہ مفت ہاتھوں میں لئے شمشیر آئے ہیں

الٰہی دے ہمیں نصرت کہ ہم تیرے بھروسے پر

زباں پر آج رکھ کر نعرۂ تکبیر آئے ہیں

جہاں پر آگ برسائی تھی تم نے آسمانوں سے

اسی بستی میں ہم کر کے نئی تعمیر آئے ہیں

سیاہی دل کی مٹ جائے گی قبلہ دیکھ لیجے ہم

لبوں پر مسکراہٹ کی لیے جاگیر آئے ہیں

ہر اک لہجہ سوالی ہے ابھی تک بزم میں تشنہؔ

گماں ہوتا ہے جیسے لکھنؤ میں میرؔ آئے ہیں