hamein haara nahin samjho ki hum dil-gir aae hain

hameñ haarā nahīñ samjho ki ham dil-gīr aa.e haiñ

kamāneñ thiiñ kahīñ par aur kahīñ se tiir aa.e haiñ

nazar bhar dekh lo ham aaj takmīl-e-tamannā meñ

tumhāre rū-ba-rū pahne hue zanjīr aa.e haiñ

ye sar hāzir hai merā gar salāmat aap rah jaa.eñ

vagarna muft hāthoñ meñ liye shamshīr aa.e haiñ

ilāhī de hameñ nusrat ki ham tere bharose par

zabāñ par aaj rakh kar nāra-e-takbīr aa.e haiñ

jahāñ par aag barsā.ī thī tum ne āsmānoñ se

usī bastī meñ ham kar ke na.ī ta.amīr aa.e haiñ

siyāhī dil kī miT jā.egī qibla dekh liije ham

laboñ par muskurāhaT kī liye jāgīr aa.e haiñ

har ik lahja savālī hai abhī tak bazm meñ 'tashna'

gumāñ hotā hai jaise lucknow meñ 'mīr' aa.e haiñ

hamein haara nahin samjho ki hum dil-gir aae hain

kamanen thin kahin par aur kahin se tir aae hain

nazar bhar dekh lo hum aaj takmil-e-tamanna mein

tumhaare ru-ba-ru pahne hue zanjir aae hain

ye sar hazir hai mera gar salamat aap rah jaen

wagarna muft hathon mein liye shamshir aae hain

ilahi de hamein nusrat ki hum tere bharose par

zaban par aaj rakh kar nara-e-takbir aae hain

jahan par aag barsai thi tum ne aasmanon se

usi basti mein hum kar ke nai tamir aae hain

siyahi dil ki miT jaegi qibla dekh lije hum

labon par muskurahaT ki liye jagir aae hain

har ek lahja sawali hai abhi tak bazm mein 'tashna'

guman hota hai jaise lucknow mein 'mir' aae hain