ہمیں جب احساس زندگی تھا تو دل میں اک خواہش نمو تھی

ہمیں جب احساس زندگی تھا تو دل میں اک خواہش نمو تھی

عجیب نکھرا ہوا تھا عالم حسین دنیائے رنگ و بو تھی

کہیں پہ تھی رنگ و بو کی کثرت کہیں پہ تقسیم رنگ و بو تھی

تلاش تھی ماسوا کی مجھ کو انہیں خود اپنی ہی جستجو تھی

نشاط انگیز تھیں ہوائیں سرور افروز تھیں فضائیں

شعور تھا اور یاد تیری نظر تھی اور تیری جستجو تھی

دیار نو میں اگر ہمارا وقار قائم نہیں تو کیا ہے

کبھی ہمارا بھی مرتبہ تھا کبھی ہماری بھی آبرو تھی

شفق کے سیلاب میں نہا کر کبھی جو ابھرے حسین ساغر

تو میکدے کی نشاط پرور فضا میں آواز ہاؤ ہو تھی

ہر اک نظر میں جمال تیرا ہر اک قدم پہ خیال تیرا

کہ آب و گل کے جہاں میں اب تک تلاش تیری ہی چار سو تھی

ترے تصور کا لمحہ لمحہ ضیاؔ کی تسکین دل کا باعث

کہ اس کی دنیا میں کچھ نہیں تھا بس ایک تیری ہی آرزو تھی