hamein jab ehsas-e-zindagi tha to dil mein ek KHwahish-e-numu thi

hameñ jab ehsās-e-zindagī thā to dil meñ ik ḳhvāhish-e-numū thī

ajiib nikhrā huā thā aalam hasīn duniyā-e-rang-o-bū thī

kahīñ pe thī rang-o-bū kī kasrat kahīñ pe taqsīm-e-rang-o-bū thī

talāsh thī mā-sivā kī mujh ko unheñ ḳhud apnī hī justujū thī

nashāt-angez thiiñ havā.eñ surūr-afroz thiiñ fazā.eñ

shu.ūr thā aur yaad terī nazar thī aur terī justujū thī

dayār-e-nau meñ agar hamārā vaqār qaa.em nahīñ to kyā hai

kabhī hamārā bhī martaba thā kabhī hamārī bhī aabrū thī

shafaq ke sailāb meñ nahā kar kabhī jo ubhre hasīn sāġhar

to mai-kade kī nashāt-parvar fazā meñ āvāz-e-hāo-hū thī

har ik nazar meñ jamāl terā har ik qadam pe ḳhayāl terā

ki āb-o-gil ke jahāñ meñ ab tak talāsh terī hī chār-sū thī

tire tasavvur kā lamha lamha 'ziyā' kī taskīn-e-dil kā baa.is

ki us kī duniyā meñ kuchh nahīñ thā bas ek terī hī aarzū thī

hamein jab ehsas-e-zindagi tha to dil mein ek KHwahish-e-numu thi

ajib nikhra hua tha aalam hasin duniya-e-rang-o-bu thi

kahin pe thi rang-o-bu ki kasrat kahin pe taqsim-e-rang-o-bu thi

talash thi ma-siwa ki mujh ko unhen KHud apni hi justuju thi

nashat-angez thin hawaen surur-afroz thin fazaen

shuur tha aur yaad teri nazar thi aur teri justuju thi

dayar-e-nau mein agar hamara waqar qaem nahin to kya hai

kabhi hamara bhi martaba tha kabhi hamari bhi aabru thi

shafaq ke sailab mein naha kar kabhi jo ubhre hasin saghar

to mai-kade ki nashat-parwar faza mein aawaz-e-hao-hu thi

har ek nazar mein jamal tera har ek qadam pe KHayal tera

ki aab-o-gil ke jahan mein ab tak talash teri hi chaar-su thi

tere tasawwur ka lamha lamha 'ziya' ki taskin-e-dil ka bais

ki us ki duniya mein kuchh nahin tha bas ek teri hi aarzu thi