hamein nayaft lamhon se mafar hota na ghar luTta

hameñ nāyāft lamhoñ se mafar hotā na ghar luTtā

ki pahlī barf-bārī meñ kahāñ zād-e-safar luTtā

kabhī vo bar-sar-e-paikār rahtā aap apne se

kabhī vo dūsroñ se dū-ba-dū zer-o-zabar luTtā

tumheñ is baat kā ehsās to hotā hazīmat par

sitāre TuuT kar girte agar ḳhvāb-e-sahar luTtā

ye dīvār-o-dar-o-mehrāb-o-mimbar hech haiñ phir bhī

hama-ālam ko luTnā hai magar tū baam par luTtā

tirī ūñchā.iyoñ ne qad ko chhoTā kar diyā sab ke

tujhe luTnā thā vus.at meñ agar be-bāl-o-par luTtā

koī āvāz pīchhe kī taraf muḌne ko kahtī hai

mire baazū qalam hote mire qadmoñ pe sar luTtā

tire dukh kī gavāhī chāñd taare bhī nahīñ dete

ki din bhar yuuñ paḌā sotā na aise raat bhar luTtā

ġhazal lutf-o-asar pā kar ba-tarz-e-'mīr' raqsāñ hai

chalo barpā kareñ mahfil chalo dekheñ sharar luTtā

'ḳhumār' aise safar meñ aañkh chhin jaatī to achchhā thā

kahīñ shāḳhoñ kā saudā aur kahīñ dekhā shajar luTtā

hamein nayaft lamhon se mafar hota na ghar luTta

ki pahli barf-bari mein kahan zad-e-safar luTta

kabhi wo bar-sar-e-paikar rahta aap apne se

kabhi wo dusron se du-ba-du zer-o-zabar luTta

tumhein is baat ka ehsas to hota hazimat par

sitare TuT kar girte agar KHwab-e-sahar luTta

ye diwar-o-dar-o-mehrab-o-mimbar hech hain phir bhi

hama-alam ko luTna hai magar tu baam par luTta

teri unchaiyon ne qad ko chhoTa kar diya sab ke

tujhe luTna tha wusat mein agar be-baal-o-par luTta

koi aawaz pichhe ki taraf muDne ko kahti hai

mere bazu qalam hote mere qadmon pe sar luTta

tere dukh ki gawahi chand tare bhi nahin dete

ki din bhar yun paDa sota na aise raat bhar luTta

ghazal lutf-o-asar pa kar ba-tarz-e-'mir' raqsan hai

chalo barpa karen mahfil chalo dekhen sharar luTta

'KHumar' aise safar mein aankh chhin jati to achchha tha

kahin shaKHon ka sauda aur kahin dekha shajar luTta