hamein nasib koi dida-war nahin hota

hameñ nasīb koī dīda-var nahīñ hotā

jo dastaras meñ hamārī hunar nahīñ hotā

maiñ roz us se yahīñ ham-kalām hotā huuñ

darūn-e-rūh kisī kā guzar nahīñ hotā

jalā diye haiñ kisī ne purāne ḳhat varna

fazā meñ aisā to raqs-e-sharar nahīñ hotā

mohabbatoñ ke ka.ī ism maiñ ne paḌh Daale

ajab tilism hai vā is kā dar nahīñ hotā

agar maiñ shab kī siyāhī na chiir kar niklūñ

koī ujālā mirā ham-safar nahīñ hotā

kisī ke naqsh-e-qadam kī thī justujū varna

maiñ is tarah to 'suḳhan' dar-ba-dar nahīñ hotā

hamein nasib koi dida-war nahin hota

jo dastaras mein hamari hunar nahin hota

main roz us se yahin ham-kalam hota hun

darun-e-ruh kisi ka guzar nahin hota

jala diye hain kisi ne purane KHat warna

faza mein aisa to raqs-e-sharar nahin hota

mohabbaton ke kai ism main ne paDh Dale

ajab tilism hai wa is ka dar nahin hota

agar main shab ki siyahi na chir kar niklun

koi ujala mera ham-safar nahin hota

kisi ke naqsh-e-qadam ki thi justuju warna

main is tarah to 'suKHan' dar-ba-dar nahin hota