hamein shaghaf hai hamesha se nafsiyat ke sath

hameñ shaġhaf hai hamesha se nafsiyāt ke saath

'amal se baḌh ke 'amal ke muharrikāt ke saath

bhale fasāna sahī man-ghaḌat kahānī sahī

tirā bhī zikr to hotā hai merī baat ke saath

ġham-e-shikast manā.ūñ ki in ko pursa duuñ

hazār hausle TuuTe haiñ merī maat ke saath

banā na piñjra daraḳhtoñ kī shakl kā zālim

na aise khel parindoñ kī nafsiyāt ke saath

jhiḌaknā baat na sunñā galā dabā denā

mirā ‘umūmī ravayya hai ḳhvāhishāt ke saath

tamām rishtoñ kī mī'ād ik muqarrar hai

ab itnī 'aql to aatī hai tajrabāt ke saath

nahīñ hai koī tamanna na.ī mohabbat kī

maiñ jī rahā huuñ guzishta kī bāqiyāt ke saath

jahāñ ke rang meñ Dhaltā huuñ is liye ki kahīñ

mujhe sajā ke na rakh de navādirāt ke saath

hamāre haath meñ aa kar na jā sakegā kahīñ

hamārī shart lagī hai tumhāre haath ke saath

usī ke naam lagegā ye jurm-e-but-shikanī

ḳhazāna jis ne chhupāyā thā somnāt ke saath

nazar paḌe na kisī kī nazar milāte hue

vo log 'ishq bhī karte the ehtiyāt ke saath

hamein shaghaf hai hamesha se nafsiyat ke sath

'amal se baDh ke 'amal ke muharrikat ke sath

bhale fasana sahi man-ghaDat kahani sahi

tera bhi zikr to hota hai meri baat ke sath

gham-e-shikast manaun ki in ko pursa dun

hazar hausle TuTe hain meri mat ke sath

bana na pinjra daraKHton ki shakl ka zalim

na aise khel parindon ki nafsiyat ke sath

jhiDakna baat na sunna gala daba dena

mera ‘umumi rawayya hai KHwahishat ke sath

tamam rishton ki mi'ad ek muqarrar hai

ab itni 'aql to aati hai tajrabaat ke sath

nahin hai koi tamanna nai mohabbat ki

main ji raha hun guzishta ki baqiyat ke sath

jahan ke rang mein Dhalta hun is liye ki kahin

mujhe saja ke na rakh de nawadiraat ke sath

hamare hath mein aa kar na ja sakega kahin

hamari shart lagi hai tumhaare hath ke sath

usi ke nam lagega ye jurm-e-but-shikani

KHazana jis ne chhupaya tha somnat ke sath

nazar paDe na kisi ki nazar milate hue

wo log 'ishq bhi karte the ehtiyat ke sath