hamein to lala-o-gul ab bhi sogwar mile

hameñ to lāla-o-gul ab bhī sogvār mile

jo ḳhūn-e-dil na jalāo to kyā bahār mile

ye kyā ki zaḳhm-e-jigar chashm-e-intizār mile

mile to sohbat-e-hūrān-e-gul-ezār mile

kahīñ to pahuñcheñ ye sahrā-navardiyāñ kab tak

vo mai-kada hī sahī gar na koī yaar mile

guloñ kā husn sabā kā ḳhirām rang-e-chaman

har ik adā meñ tirī mastī-e-bahār mile

haiñ tere shahr meñ kuchh to moallim-e-aḳhlāq

jinheñ ye fikr ki dāman na dāġh-dār mile

hamārī tarah jo mast-e-alast rahtī haiñ

unheñ na halqa-e-rindāñ na kū-e-yār mile

batāo tum ne bhī un meñ kisī ko chāhā hai

tumhāre chāhne vaale to be-shumār mile

kisī ko paayā hai ham ne jo be-misāl 'anjum'

qarār kho ke mile us se bār-bār mile

hamein to lala-o-gul ab bhi sogwar mile

jo KHun-e-dil na jalao to kya bahaar mile

ye kya ki zaKHm-e-jigar chashm-e-intizar mile

mile to sohbat-e-huran-e-gul-ezar mile

kahin to pahunchen ye sahra-nawardiyan kab tak

wo mai-kada hi sahi gar na koi yar mile

gulon ka husn saba ka KHiram rang-e-chaman

har ek ada mein teri masti-e-bahaar mile

hain tere shahr mein kuchh to moallim-e-aKHlaq

jinhen ye fikr ki daman na dagh-dar mile

hamari tarah jo mast-e-alast rahti hain

unhen na halqa-e-rindan na ku-e-yar mile

batao tum ne bhi un mein kisi ko chaha hai

tumhaare chahne wale to be-shumar mile

kisi ko paya hai hum ne jo be-misal 'anjum'

qarar kho ke mile us se bar-bar mile