hamein to sirf yahi ek KHushi hai thoDi bahut

hameñ to sirf yahī ik ḳhushī hai thoḌī bahut

hamārī us se jo vābastagī hai thoḌī bahut

is ik umiid pe sāgar use pukāregā

nadī meñ ab bhī ravānī bachī hai thoḌī bahut

jise tum ishq samajhne lage ho ujlat meñ

vo kuchh nahīñ hai faqat dostī hai thoḌī bahut

hamāre haal se vāqif karā.egī us ko

jo ek khiḌkī abhī tak khulī hai thoḌī bahut

palaT bhī aao hai antim paḌāv umr kā ye

ki ab ye zindagī baaqī bachī hai thoḌī bahut

tumhāre jaane se ye bhī na ḳhatm ho jaa.e

jo shahr-e-dil meñ abhī raushnī hai thoḌī bahut

chalā gayā hai vo sūraj par us ḳhayāl kī dhuup

hamāre sahn meñ ab bhī khilī hai thoḌī bahut

khulā ye ham pe tirī mahfiloñ se aate hue

udāsī dil meñ jagah kar chukī hai thoḌī bahut

hamein to sirf yahi ek KHushi hai thoDi bahut

hamari us se jo wabastagi hai thoDi bahut

is ek umid pe sagar use pukarega

nadi mein ab bhi rawani bachi hai thoDi bahut

jise tum ishq samajhne lage ho ujlat mein

wo kuchh nahin hai faqat dosti hai thoDi bahut

hamare haal se waqif karaegi us ko

jo ek khiDki abhi tak khuli hai thoDi bahut

palaT bhi aao hai antim paDaw umr ka ye

ki ab ye zindagi baqi bachi hai thoDi bahut

tumhaare jaane se ye bhi na KHatm ho jae

jo shahr-e-dil mein abhi raushni hai thoDi bahut

chala gaya hai wo suraj par us KHayal ki dhup

hamare sahn mein ab bhi khili hai thoDi bahut

khula ye hum pe teri mahfilon se aate hue

udasi dil mein jagah kar chuki hai thoDi bahut