hamesha KHush raho tum aur dua kya

hamesha ḳhush raho tum aur duā kyā

ba-juz is ke faqīroñ kī sadā kyā

hasīnoñ kī jafāoñ kā gila kyā

sitam-gāroñ se ummīd-e-vafā kyā

zarā aane to do fasl-e-bahārāñ

abhī zikr-e-junūn-e-fitna-zā kyā

mizāj-e-husn se maiñ āshnā huuñ

na pūchho dil kā mere mudda.ā kyā

fuzūñ-tar ho ga.e kuchh ġham hamāre

ba-juz is ke mohabbat meñ milā kyā

shikāyat hai to baḳht-e-nā-rasā se

hasīnoñ se taġhāful kā gila kyā

agar vo duur haiñ merī nazar se

to aisī zindagī kā phir mazā kyā

junūn-e-ishq se ghabrā rahā huuñ

na kah de vo kahīñ us ko huā kyā

samajh kar mujh ko dīvāna vo 'aslam'

ḳhudā-ma.alūm farmā.eñ sazā kyā

hamesha KHush raho tum aur dua kya

ba-juz is ke faqiron ki sada kya

hasinon ki jafaon ka gila kya

sitam-garon se ummid-e-wafa kya

zara aane to do fasl-e-bahaaran

abhi zikr-e-junun-e-fitna-za kya

mizaj-e-husn se main aashna hun

na puchho dil ka mere muddaa kya

fuzun-tar ho gae kuchh gham hamare

ba-juz is ke mohabbat mein mila kya

shikayat hai to baKHt-e-na-rasa se

hasinon se taghaful ka gila kya

agar wo dur hain meri nazar se

to aisi zindagi ka phir maza kya

junun-e-ishq se ghabra raha hun

na kah de wo kahin us ko hua kya

samajh kar mujh ko diwana wo 'aslam'

KHuda-malum farmaen saza kya