hamesha ki tarah banhen meri patwar karne ka

hamesha kī tarah bāñheñ mirī patvār karne kā

kiyā hai faisla naav ne dariyā paar karne kā

vahī hai mashġhala sadiyoñ purānā aaj bhī apnā

zamīñ par bojh hone āsmāñ ko baar karne kā

safar kā marhala to ba.ad meñ mahl-e-nazar hogā

abhī to mudda.ā hai rāsta pur-ḳhār karne kā

ta.alluq TūTtā jaatā hai apne-āp se merā

tavassut ban rahī hai āgahī bezār karne kā

mujhe rakhtī hai mushkil roz-marra kī sahūlat meñ

mirā ma.amūl hai āsāniyāñ dushvār karne kā

tamaddun ko havā detī hai āshufta-sarī merī

mujhe ta.amīr kartā hai junūñ mismār karne kā

kahāñ tak aur jaane āzmātī jā.egī mujh par

hunar jo jāntī hai shā.erī bekār karne kā

vo kuchh se kuchh banā Dālegā taslīmat ke ma.anī

salīqa aa gayā us ko agar inkār karne kā

na jaane soch kar sūraj ne kyā shab kī qalam-rau par

irāda multavī hī kar diyā yalġhār karne kā

hamesha ki tarah banhen meri patwar karne ka

kiya hai faisla naw ne dariya par karne ka

wahi hai mashghala sadiyon purana aaj bhi apna

zamin par bojh hone aasman ko bar karne ka

safar ka marhala to baad mein mahl-e-nazar hoga

abhi to muddaa hai rasta pur-KHar karne ka

talluq TuTta jata hai apne-ap se mera

tawassut ban rahi hai aagahi bezar karne ka

mujhe rakhti hai mushkil roz-marra ki sahulat mein

mera mamul hai aasaniyan dushwar karne ka

tamaddun ko hawa deti hai aashufta-sari meri

mujhe tamir karta hai junun mismar karne ka

kahan tak aur jaane aazmati jaegi mujh par

hunar jo jaanti hai shaeri bekar karne ka

wo kuchh se kuchh bana Dalega taslimat ke mani

saliqa aa gaya us ko agar inkar karne ka

na jaane soch kar suraj ne kya shab ki qalam-rau par

irada multawi hi kar diya yalghaar karne ka