hamesha uski manen ye gawara bhi nahin hota

hamesha us kī māneñ ye gavārā bhī nahīñ hotā

baġhair us shaḳhs ke lekin guzārā bhī nahīñ hotā

ḳhudā jaane ki ab yūsuf ḳharīde kyoñ nahīñ jaate

ba-zāhir is tijārat meñ ḳhasāra bhī nahīñ hotā

zarūrī to nahīñ ki har duā manzūr ho jaa.e

magar is se baḌā koī sahārā bhī nahīñ hotā

mohabbat kī harārat se pighal jaate haiñ patthar bhī

savā neze pe sūraj ko utārā bhī nahīñ hotā

yūñhī mānūs āvāzeñ sunā.ī detī rahtī haiñ

kisī ne jaane vaale ko pukārā bhī nahīñ hotā

ta.alluq sab se rakhte haiñ magar terī vasātat se

tumhārā jo nahīñ hotā hamārā bhī nahīñ hotā

hamesha us ki manen ye gawara bhi nahin hota

baghair us shaKHs ke lekin guzara bhi nahin hota

KHuda jaane ki ab yusuf KHaride kyon nahin jate

ba-zahir is tijarat mein KHasara bhi nahin hota

zaruri to nahin ki har dua manzur ho jae

magar is se baDa koi sahaara bhi nahin hota

mohabbat ki hararat se pighal jate hain patthar bhi

sawa neze pe suraj ko utara bhi nahin hota

yunhi manus aawazen sunai deti rahti hain

kisi ne jaane wale ko pukara bhi nahin hota

talluq sab se rakhte hain magar teri wasatat se

tumhaara jo nahin hota hamara bhi nahin hota