hamin hain mashq-e-sitam-ha-e-asman ke liye

hamīñ haiñ mashq-e-sitam-hā-e-āsmāñ ke liye

chune ga.e haiñ hamīñ yās-e-jāvedāñ ke liye

qasam ḳhudā kī nahīñ shauq-e-zindagī ham ko

hameñ ye chāhiye us husn-e-jāñ-sitāñ ke liye

izāfa aur ġham-e-jāñ-sitāñ meñ hotā hai

asar banā hī nahīñ hai mirī fuġhāñ ke liye

ḳhabar nahīñ mirā tinkoñ kā ek jā karnā

hai bijliyoñ ke liye yā ki āshiyāñ ke liye

kisī kī teġh gale par chale to kyā us se

kahāñ nashāt-e-shahādat hai saḳht-jāñ ke liye

hazāroñ zulm vo kartā hai is bahāne se

adā tumhārī khilaunā hai āsmāñ ke liye

vo jo hai saare zamāne kā juz tire 'bedil'

taḌap ye hai usī begāna mehrbāñ ke liye

hamin hain mashq-e-sitam-ha-e-asman ke liye

chune gae hain hamin yas-e-jawedan ke liye

qasam KHuda ki nahin shauq-e-zindagi hum ko

hamein ye chahiye us husn-e-jaan-sitan ke liye

izafa aur gham-e-jaan-sitan mein hota hai

asar bana hi nahin hai meri fughan ke liye

KHabar nahin mera tinkon ka ek ja karna

hai bijliyon ke liye ya ki aashiyan ke liye

kisi ki tegh gale par chale to kya us se

kahan nashat-e-shahadat hai saKHt-jaan ke liye

hazaron zulm wo karta hai is bahane se

ada tumhaari khilauna hai aasman ke liye

wo jo hai sare zamane ka juz tere 'bedil'

taDap ye hai usi begana mehrban ke liye