hamin nahin gham-o-alam ke satae hue

hamīñ nahīñ ġham-o-ālām ke satā.e hue

har ek shaḳhs koī dard hai chhupā.e hue

tumhīñ ko yaaro mubārak hoñ sāġhar-o-mīnā

vo din ga.e the jo ham mai-kada sajā.e hue

sabhī ko chāhiye saaqī kī multafit nazreñ

magar hai sāqī-e-daurāñ nazar chhupā.e hue

baḌe jatan se jinheñ muntaḳhab kiyā ham ne

vahī sire se hamīñ ko haiñ kyoñ bhulā.e hue

chale bhī aao shab-e-hijr baḌhtī jaatī hai

charāġh dil ke lahū se haiñ ham jalā.e hue

hai bholā-bhālā sā chehra adā.eñ bhī haiñ hasīñ

burī nazar se rakho ḳhud ko tum bachā.e hue

kabhī to dekh mirī samt ai jahāñ vaale

maiñ jī rahā huuñ yahāñ bār-e-ġham uThā.e hue

tire sivā na kisī aur dar pe mere ḳhudā

paḌe na jiinā kabhī mujh ko sar jhukā.e hue

mirī nigāh meñ 'sāhir' aziim log haiñ vo

hamesha dil jo ibādat meñ haiñ lagā.e hue

hamin nahin gham-o-alam ke satae hue

har ek shaKHs koi dard hai chhupae hue

tumhin ko yaro mubarak hon saghar-o-mina

wo din gae the jo hum mai-kada sajae hue

sabhi ko chahiye saqi ki multafit nazren

magar hai saqi-e-dauran nazar chhupae hue

baDe jatan se jinhen muntaKHab kiya hum ne

wahi sire se hamin ko hain kyon bhulae hue

chale bhi aao shab-e-hijr baDhti jati hai

charagh dil ke lahu se hain hum jalae hue

hai bhola-bhaala sa chehra adaen bhi hain hasin

buri nazar se rakho KHud ko tum bachae hue

kabhi to dekh meri samt ai jahan wale

main ji raha hun yahan bar-e-gham uThae hue

tere siwa na kisi aur dar pe mere KHuda

paDe na jina kabhi mujh ko sar jhukae hue

meri nigah mein 'sahir' azim log hain wo

hamesha dil jo ibaadat mein hain lagae hue