ہمیں نہیں غم و آلام کے ستائے ہوئے

ہمیں نہیں غم و آلام کے ستائے ہوئے

ہر ایک شخص کوئی درد ہے چھپائے ہوئے

تمہیں کو یارو مبارک ہوں ساغر و مینا

وہ دن گئے تھے جو ہم میکدہ سجائے ہوئے

سبھی کو چاہئے ساقی کی ملتفت نظریں

مگر ہے ساقیٔ دوراں نظر چھپائے ہوئے

بڑے جتن سے جنہیں منتخب کیا ہم نے

وہی سرے سے ہمیں کو ہیں کیوں بھلائے ہوئے

چلے بھی آؤ شب ہجر بڑھتی جاتی ہے

چراغ دل کے لہو سے ہیں ہم جلائے ہوئے

ہے بھولا بھالا سا چہرہ ادائیں بھی ہیں حسیں

بری نظر سے رکھو خود کو تم بچائے ہوئے

کبھی تو دیکھ مری سمت اے جہاں والے

میں جی رہا ہوں یہاں بار غم اٹھائے ہوئے

ترے سوا نہ کسی اور در پہ میرے خدا

پڑے نہ جینا کبھی مجھ کو سر جھکائے ہوئے

مری نگاہ میں ساحرؔ عظیم لوگ ہیں وہ

ہمیشہ دل جو عبادت میں ہیں لگائے ہوئے