hamin par dhup barsata hai suraj bhi muqaddar bhi

hamīñ par dhuup barsātā hai sūraj bhī muqaddar bhī

daraḳht-e-mehrbāñ koī kare saaya to ham par bhī

ayaañ hotī chalī jaatī haiñ sab chehre kī tahrīreñ

huī jaatī hai nā-kāfī ḳhamoshī kī ye chādar bhī

badan kī raushnī meñ jo na dekhā jā sakā ham se

usī shīshe ke paikar meñ dhaḌaktā thā vo patthar bhī

haqīqat se tasavvur tak safar mujh meñ kiyā us ne

magar mujh tak nahīñ pahuñchā vo itnī duur chal kar bhī

koī mūsā-o-īsā-o-mohammad ab na aa.egā

hamāre nā-tavāñ shānoñ pe hai kār-e-payambar bhī

hamin par dhup barsata hai suraj bhi muqaddar bhi

daraKHt-e-mehrban koi kare saya to hum par bhi

ayan hoti chali jati hain sab chehre ki tahriren

hui jati hai na-kafi KHamoshi ki ye chadar bhi

badan ki raushni mein jo na dekha ja saka hum se

usi shishe ke paikar mein dhaDakta tha wo patthar bhi

haqiqat se tasawwur tak safar mujh mein kiya us ne

magar mujh tak nahin pahuncha wo itni dur chal kar bhi

koi musa-o-isa-o-mohammad ab na aaega

hamare na-tawan shanon pe hai kar-e-payambar bhi