hamin se toD ke rishta safar pe nikla hai

hamīñ se toḌ ke rishta safar pe niklā hai

hamārā saaya akelā safar pe niklā hai

qadam qadam na.e zaḳhmoñ ke phuul mahkāo

ki koī rashk-e-masīhā safar pe niklā hai

hamāre ġham ke sharīk-e-safar haiñ aañsū bhī

charāġh le ke añdherā safar pe niklā hai

batā rahā hai havāoñ kā zor aaj kī shab

koī charāġh akelā safar pe niklā hai

samundaroñ se kaho farsh-e-rāh ho jaa.eñ

sunā hai aaj vo pyāsā safar pe niklā hai

shikast-e-dil ke marāhil se pahle ham guzre

hamāre baa'd zamāna safar pe niklā hai

tamām 'umr jo ai 'badr' gardishoñ meñ rahā

thakā thakā vo saverā safar pe niklā hai

hamin se toD ke rishta safar pe nikla hai

hamara saya akela safar pe nikla hai

qadam qadam nae zaKHmon ke phul mahkao

ki koi rashk-e-masiha safar pe nikla hai

hamare gham ke sharik-e-safar hain aansu bhi

charagh le ke andhera safar pe nikla hai

bata raha hai hawaon ka zor aaj ki shab

koi charagh akela safar pe nikla hai

samundaron se kaho farsh-e-rah ho jaen

suna hai aaj wo pyasa safar pe nikla hai

shikast-e-dil ke marahil se pahle hum guzre

hamare ba'd zamana safar pe nikla hai

tamam 'umr jo ai 'badr' gardishon mein raha

thaka thaka wo sawera safar pe nikla hai