hamin the aise sar-phire hamin the aise manchale

hamīñ the aise sar-phire hamīñ the aise manchale

ki tere ġham kī raat meñ charāġh kī tarah jale

mile koī to phir maze na zindagī ke pūchhiye

kaTe jo raat dair meñ to mai-kade meñ din Dhale

khilī huī har ik kalī mahak rahī hai shāḳh par

to kuchh udaas phuul bhī paḌe haiñ shāḳh ke tale

is anjuman ko kyā huā na raushnī na zindagī

charāġh o gul jale bujhe dimāġh o dil mile dale

ye baat talḳh hai magar ye baat guftanī bhī hai

ki zāhidān-e-ḳhud-nigar se rind-e-bā-safā bhale

ġhurūb-e-āftāb par sitāre muskurā.e haiñ

ki ik diyā bujhā to kyā hazār-hā diye jale

'shamīm' manzil-e-talab qadam ko aa ke chuum le

agar qadam ko joḌ kar tamām kārvāñ chale

hamin the aise sar-phire hamin the aise manchale

ki tere gham ki raat mein charagh ki tarah jale

mile koi to phir maze na zindagi ke puchhiye

kaTe jo raat dair mein to mai-kade mein din Dhale

khili hui har ek kali mahak rahi hai shaKH par

to kuchh udas phul bhi paDe hain shaKH ke tale

is anjuman ko kya hua na raushni na zindagi

charagh o gul jale bujhe dimagh o dil mile dale

ye baat talKH hai magar ye baat guftani bhi hai

ki zahidan-e-KHud-nigar se rind-e-ba-safa bhale

ghurub-e-aftab par sitare muskurae hain

ki ek diya bujha to kya hazar-ha diye jale

'shamim' manzil-e-talab qadam ko aa ke chum le

agar qadam ko joD kar tamam karwan chale