hamin the jaan-e-bahaaran hamin the rang-e-tarab

hamīñ the jān-e-bahārāñ hamīñ the rañg-e-tarab

hamīñ haiñ bazm-e-mai-o-gul meñ aaj mohr-ba-lab

vahī tujhe bhī nazar aa.e be-adab jo log

faqīh-e-shahr se uljhe tirī galī ke sabab

ḳhayāl-o-fikr ke phir silsile sulag na uTheñ

ki chubh rahī hai diloñ meñ havā-e-gesū-e-shab

bas ek jaam ne rindoñ kī aabrū rakh lī

vagarna kam na thā vaa.iz kā shor-e-ġhaiz-o-ġhazab

chalo kalī ke tabassum kā raaz pūchh aa.eñ

guloñ ke qāfile chal deñ chaman se jaane kab

abhī se dhaḌkaneñ ḳhāmosh hotī jaatī haiñ

ajiib hogā samāñ vo bhī tum na aaoge jab

hameñ hī tāb-e-samā.at na ho sakī 'rāhat'

fasāna-ḳhvāñ ne to chheḌā thā zikr-e-ahd-e-tarab

hamin the jaan-e-bahaaran hamin the rang-e-tarab

hamin hain bazm-e-mai-o-gul mein aaj mohr-ba-lab

wahi tujhe bhi nazar aae be-adab jo log

faqih-e-shahr se uljhe teri gali ke sabab

KHayal-o-fikr ke phir silsile sulag na uThen

ki chubh rahi hai dilon mein hawa-e-gesu-e-shab

bas ek jam ne rindon ki aabru rakh li

wagarna kam na tha waiz ka shor-e-ghaiz-o-ghazab

chalo kali ke tabassum ka raaz puchh aaen

gulon ke qafile chal den chaman se jaane kab

abhi se dhaDkanen KHamosh hoti jati hain

ajib hoga saman wo bhi tum na aaoge jab

hamein hi tab-e-samaat na ho saki 'rahat'

fasana-KHwan ne to chheDa tha zikr-e-ahd-e-tarab