hamrah-e-abr barq-e-farozan bhi aaegi

hamrāh-e-abr barq-e-farozāñ bhī aa.egī

vo ā.eñge to āh-e-raqībāñ bhī aa.egī

dil bujh gayā to aur baḌhegī ye tīrgī

jalte raho ki sub.h-e-daraḳhshāñ bhī aa.egī

phūTeñge aable to khileñge ka.ī gulāb

fasl-e-bahār sū-e-bayābāñ bhī aa.egī

kam-kam rahegī dil meñ tire dhuup kī chubhan

sahrā meñ tujh ko yād-e-gulistāñ bhī aa.egī

ai andalīb lab pe na lā shikva-e-ḳhizāñ

āḳhir kabhī to fasl-e-bahārāñ bhī aa.egī

chhoḌā vatan to is kā gumāñ tak na thā ki yuuñ

ġhurbat meñ yād-e-mahfil-e-yārāñ bhī aa.egī

nazzārgī meñ hosh kise thā ki ai 'naresh'

sūrat koī qarīb-e-rag-e-jāñ bhī aa.egī

hamrah-e-abr barq-e-farozan bhi aaegi

wo aaenge to aah-e-raqiban bhi aaegi

dil bujh gaya to aur baDhegi ye tirgi

jalte raho ki subh-e-daraKHshan bhi aaegi

phuTenge aable to khilenge kai gulab

fasl-e-bahaar su-e-bayaban bhi aaegi

kam-kam rahegi dil mein tere dhup ki chubhan

sahra mein tujh ko yaad-e-gulistan bhi aaegi

ai andalib lab pe na la shikwa-e-KHizan

aaKHir kabhi to fasl-e-bahaaran bhi aaegi

chhoDa watan to is ka guman tak na tha ki yun

ghurbat mein yaad-e-mahfil-e-yaran bhi aaegi

nazzargi mein hosh kise tha ki ai 'naresh'

surat koi qarib-e-rag-e-jaan bhi aaegi