hamwar khinch kar kabhi dushwar khinch kar

hamvār khīñch kar kabhī dushvār khīñch kar

tang aa chukā huuñ saañs lagātār khīñch kar

maidāñ meñ gar na aatā maiñ talvār khīñch kar

le jaate log misr ke bāzār khīñch kar

ḳhātir meñ kuchh na lā.egā ye sail-e-ashk hai

tum rokte ho ret kī dīvār khīñch kar

uktā chukā ye dil bhī nazar bhī maiñ aap bhī

muddat se terī hasrat-e-dīdār khīñch kar

ai ziist terā faisla karne lagā thā maiñ

laate agar na mujh ko mire yaar khīñch kar

hargiz ye aise mānñe vaalī nahīñ miyāñ

duniyā ko do lagā sar-e-bāzār khīñch kar

jaatā rahā vo kaif-e-nihāñ jo chubhan meñ thā

pachhtā rahā huuñ paañv ke ab ḳhaar khīñch kar

mere ḳhayāl meñ thī kahānī yahīñ talak

ab kyoñ baḌhā.e jaate haiñ kirdār khīñch kar

'tāsif' agar hai maal kharā to yaqīn rakh

lā.egā aap apne ḳharīdār khīñch kar

hamwar khinch kar kabhi dushwar khinch kar

tang aa chuka hun sans lagatar khinch kar

maidan mein gar na aata main talwar khinch kar

le jate log misr ke bazar khinch kar

KHatir mein kuchh na laega ye sail-e-ashk hai

tum rokte ho ret ki diwar khinch kar

ukta chuka ye dil bhi nazar bhi main aap bhi

muddat se teri hasrat-e-didar khinch kar

ai zist tera faisla karne laga tha main

late agar na mujh ko mere yar khinch kar

hargiz ye aise manne wali nahin miyan

duniya ko do laga sar-e-bazar khinch kar

jata raha wo kaif-e-nihan jo chubhan mein tha

pachhta raha hun panw ke ab KHar khinch kar

mere KHayal mein thi kahani yahin talak

ab kyon baDhae jate hain kirdar khinch kar

'tasif' agar hai mal khara to yaqin rakh

laega aap apne KHaridar khinch kar