hangam-e-shab-o-roz mein uljha hua kyun hun

hañgām-e-shab-o-roz meñ uljhā huā kyuuñ huuñ

dariyā huuñ to phir raah meñ Thahrā huā kyuuñ huuñ

kyuuñ merī jaḌeñ jā ke zamīñ se nahīñ miltīñ

gamle kī tarah sahn meñ rakkhā huā kyuuñ huuñ

is ghar ke makīnoñ kā ravayya bhī to dekhūñ

taz.īn-e-dar-o-bām meñ khoyā huā kyuuñ huuñ

girtī nahīñ kyuuñ mujh pe kisī zaḳhm kī shabnam

maiñ qāfila-e-dard se bachhḌā huā kyuuñ huuñ

āñkhoñ pe jo utrā na huā dil pe jo tahrīr

us ḳhvāb kī ta.abīr se sahmā huā kyuuñ huuñ

din bhar ke jhameloñ se bachā laayā thā ḳhud ko

shaam aate hī 'ashfāq' maiñ TuuTā huā kyuuñ huuñ

hangam-e-shab-o-roz mein uljha hua kyun hun

dariya hun to phir rah mein Thahra hua kyun hun

kyun meri jaDen ja ke zamin se nahin miltin

gamle ki tarah sahn mein rakkha hua kyun hun

is ghar ke makinon ka rawayya bhi to dekhun

tazin-e-dar-o-baam mein khoya hua kyun hun

girti nahin kyun mujh pe kisi zaKHm ki shabnam

main qafila-e-dard se bachhDa hua kyun hun

aankhon pe jo utra na hua dil pe jo tahrir

us KHwab ki tabir se sahma hua kyun hun

din bhar ke jhamelon se bacha laya tha KHud ko

sham aate hi 'ashfaq' main TuTa hua kyun hun