hans hans kar aansu pi jaana aap ke bas ki baat nahin

hañs hañs kar aañsū pī jaanā aap ke bas kī baat nahīñ

apne ghar meñ aag lagānā aap ke bas kī baat nahīñ

dīvānoñ kī āñkheñ bhī ā.īne jaise hotī haiñ

dīvānoñ se aañkh milānā aap ke bas kī baat nahīñ

ab to maut uThā.e ham ko to shāyad ham uTh jaa.eñ

ham ko apne dar se uThānā aap ke bas kī baat nahīñ

har ik gaam pe us kī galī meñ tanz ke patthar chalte haiñ

us kī galī meñ ānā-jānā aap ke bas kī baat nahīñ

yuuñ to ham ne aap kī ḳhātir hosh gañvā.e jog liyā

lekin ab ham ko samjhānā aap ke bas kī baat nahīñ

aap kī ye tanhā.ī ik din merā naam pukāregī

uljhī huī zulfeñ suljhāna aap ke bas kī baat nahīñ

hans hans kar aansu pi jaana aap ke bas ki baat nahin

apne ghar mein aag lagana aap ke bas ki baat nahin

diwanon ki aankhen bhi aaine jaise hoti hain

diwanon se aankh milana aap ke bas ki baat nahin

ab to maut uThae hum ko to shayad hum uTh jaen

hum ko apne dar se uThana aap ke bas ki baat nahin

har ek gam pe us ki gali mein tanz ke patthar chalte hain

us ki gali mein aana-jaana aap ke bas ki baat nahin

yun to hum ne aap ki KHatir hosh ganwae jog liya

lekin ab hum ko samjhana aap ke bas ki baat nahin

aap ki ye tanhai ek din mera nam pukaregi

uljhi hui zulfen suljhana aap ke bas ki baat nahin