hans hans ke bolne ki faza kaun le gaya

hañs hañs ke bolne kī fazā kaun le gayā

āñgan se shor-o-ġhul kī sadā kaun le gayā

piine lagī haiñ zahr-e-tafakkur sharārateñ

bachchoñ se bhole-pan kī adā kaun le gayā

sach bolne kī saarī rivāyat kahāñ ga.ī

virse meñ jo milī thī fazā kaun le gayā

de ke shajar shajar ko udāsī kī tez dhuup

shāḳhoñ se pattiyoñ kī ridā kaun le gayā

āsūdgī kī khoj meñ niklā huuñ sū-e-dasht

shahroñ kī pur-sukūn fazā kaun le gayā

bārūd rakh ke mere darīchoñ ke aas paas

sarsabz vādiyoñ kī havā kaun le gayā

mehnat-kashoñ ko bhuuk hī ḳhairāt meñ milī

razzāq ban ke rizq-e-vafā kaun le gayā

hans hans ke bolne ki faza kaun le gaya

aangan se shor-o-ghul ki sada kaun le gaya

pine lagi hain zahr-e-tafakkur shararaten

bachchon se bhole-pan ki ada kaun le gaya

sach bolne ki sari riwayat kahan gai

wirse mein jo mili thi faza kaun le gaya

de ke shajar shajar ko udasi ki tez dhup

shaKHon se pattiyon ki rida kaun le gaya

aasudgi ki khoj mein nikla hun su-e-dasht

shahron ki pur-sukun faza kaun le gaya

barud rakh ke mere darichon ke aas pas

sarsabz wadiyon ki hawa kaun le gaya

mehnat-kashon ko bhuk hi KHairaat mein mili

razzaq ban ke rizq-e-wafa kaun le gaya