hanse roe phire ruswa hue jage bandhe chhuTe

hañse ro.e phire rusvā hue jaage bañdhe chhūTe

ġharaz ham ne bhī kyā kyā kuchh mohabbat ke maze luuTe

kaleje meñ phaphūle dil meñ daaġh aur gul haiñ hāthoñ par

khile haiñ dekhiye ham meñ bhī ye ulfat ke gul-būTe

tafāvut kuchh nahīñ gulchīñ meñ aur be-dard ḳhūbāñ meñ

jo us ke haath gul TuuTe to in ke haath dil TuuTe

hazāroñ gāliyāñ diiñ phir zarā hañs kar idhar dekhā

bhalā itnī tasallī se phaphūle dil ke kab phūTe

kuchalte ho mujhe tum maiñ ye māñgūñ huuñ duā dil meñ

koī dilbar mire aage tumheñ bhī ḳhuub sā kuuTe

zabāñ kī kar ke miqrāz aur banā dushnām kā kāġhaz

hamāre haq meñ kyā kyā aap ne katre haiñ gul-būTe

ye kahte haiñ ki āshiq chhūT jaatā hai aziyyat se

jab us kī umr ko lashkar ajal kā aan kar luuTe

hamārī ruuh to phirtī hai māshūqoñ kī galiyoñ meñ

'nazīr' ab ham to mar kar bhī na is janjāl se chhūTe

hanse roe phire ruswa hue jage bandhe chhuTe

gharaz hum ne bhi kya kya kuchh mohabbat ke maze luTe

kaleje mein phaphule dil mein dagh aur gul hain hathon par

khile hain dekhiye hum mein bhi ye ulfat ke gul-buTe

tafawut kuchh nahin gulchin mein aur be-dard KHuban mein

jo us ke hath gul TuTe to in ke hath dil TuTe

hazaron galiyan din phir zara hans kar idhar dekha

bhala itni tasalli se phaphule dil ke kab phuTe

kuchalte ho mujhe tum main ye mangun hun dua dil mein

koi dilbar mere aage tumhein bhi KHub sa kuTe

zaban ki kar ke miqraaz aur bana dushnam ka kaghaz

hamare haq mein kya kya aap ne katre hain gul-buTe

ye kahte hain ki aashiq chhuT jata hai aziyyat se

jab us ki umr ko lashkar ajal ka aan kar luTe

hamari ruh to phirti hai mashuqon ki galiyon mein

'nazir' ab hum to mar kar bhi na is janjal se chhuTe