hansne rone se gae rabt baDhane se gae

hañsne rone se ga.e rabt baḌhāne se ga.e

aisī uftād paḌī saare zamāne se ga.e

vo ta.affun hai ki is baar zamīñ ke baasī

apne sajdoñ se ga.e rizq kamāne se ga.e

dil to pahle hī judā the yahāñ bastī vaalo

kyā qayāmat hai ki ab haath milāne se ga.e

is qadar qaht-e-vafā hai mire atrāf ki ab

yaar yāroñ ko bhī ahvāl sunāne se ga.e

zaḳhm itne the ki mumkin hī na thā un kā shumār

phir bhī ai dost tire haath lagāne se ga.e

apnī qāmat meñ falak-bos the ham log magar

ik zamīñ-zād ke āvāz lagāne se ga.e

apnā ye haal ki haiñ jaan bachāne meñ magan

aur ajdād jo the jaan laḌāne se ga.e

tujh ko kyā ilm ki ham terī mohabbat ke tufail

saarī duniyā se kaTe saare zamāne se ga.e

hansne rone se gae rabt baDhane se gae

aisi uftad paDi sare zamane se gae

wo taffun hai ki is bar zamin ke basi

apne sajdon se gae rizq kamane se gae

dil to pahle hi juda the yahan basti walo

kya qayamat hai ki ab hath milane se gae

is qadar qaht-e-wafa hai mere atraf ki ab

yar yaron ko bhi ahwal sunane se gae

zaKHm itne the ki mumkin hi na tha un ka shumar

phir bhi ai dost tere hath lagane se gae

apni qamat mein falak-bos the hum log magar

ek zamin-zad ke aawaz lagane se gae

apna ye haal ki hain jaan bachane mein magan

aur ajdad jo the jaan laDane se gae

tujh ko kya ilm ki hum teri mohabbat ke tufail

sari duniya se kaTe sare zamane se gae