haq-nawa jurat-e-izhaar tak aa pahunche hain

haq-navā jur.at-e-iz.hār tak aa pahuñche haiñ

hausle ab rasan-o-dār tak aa pahuñche haiñ

shaiḳh sāhab bhī haiñ saaqī tire maiḳhāne meñ

terī jannat meñ gunahgār tak aa pahuñche haiñ

dard-e-dil kā mire afsāna haiñ vo do aañsū

jo tire phuul se ruḳhsār tak aa pahuñche haiñ

in bayānoñ se mirā koī ta.alluq hī nahīñ

jo mire naam se aḳhbār tak aa pahuñche haiñ

amn-e-ālam kī duā ke liye jo uThte the

aaj vo haath bhī talvār tak aa pahuñche haiñ

hal nikal aayā hai gumrāhī-e-dil kā jab se

ġham zamāne ke ġham-e-yār tak aa pahuñche haiñ

dekhiye un ko chaman meñ nazar aa.e kyā kyā

'shauq' jo nargis-e-bīmār tak aa pahuñche haiñ

haq-nawa jurat-e-izhaar tak aa pahunche hain

hausle ab rasan-o-dar tak aa pahunche hain

shaiKH sahab bhi hain saqi tere maiKHane mein

teri jannat mein gunahgar tak aa pahunche hain

dard-e-dil ka mere afsana hain wo do aansu

jo tere phul se ruKHsar tak aa pahunche hain

in bayanon se mera koi talluq hi nahin

jo mere nam se aKHbar tak aa pahunche hain

amn-e-alam ki dua ke liye jo uThte the

aaj wo hath bhi talwar tak aa pahunche hain

hal nikal aaya hai gumrahi-e-dil ka jab se

gham zamane ke gham-e-yar tak aa pahunche hain

dekhiye un ko chaman mein nazar aae kya kya

'shauq' jo nargis-e-bimar tak aa pahunche hain