haq-parasti ke saza-war hua karte the

haq-parastī ke sazā-vār huā karte the

ham kabhī sāhab-e-kirdār huā karte the

koī maz.hab ho koī rañg ho mil baiThte the

des meñ aise bhī tehvār huā karte the

pās-e-tahzīb thā ik vo bhī zamāna thā kabhī

mere dushman bhī mire yaar huā karte the

is tarah thak ke to baiThā nahīñ karte the ham

rāste pahle bhī dushvār huā karte the

ab to sūkhe hue pattoñ kā bharam rakhte haiñ

ham kabhī shāḳh-e-samar-dār huā karte the

pagḌiyāñ qadmoñ meñ rakhne kā hunar siikh ga.e

ham vahī haiñ jo sar-e-dār huā karte the

haq-parasti ke saza-war hua karte the

hum kabhi sahab-e-kirdar hua karte the

koi mazhab ho koi rang ho mil baiThte the

des mein aise bhi tehwar hua karte the

pas-e-tahzib tha ek wo bhi zamana tha kabhi

mere dushman bhi mere yar hua karte the

is tarah thak ke to baiTha nahin karte the hum

raste pahle bhi dushwar hua karte the

ab to sukhe hue patton ka bharam rakhte hain

hum kabhi shaKH-e-samar-dar hua karte the

pagDiyan qadmon mein rakhne ka hunar sikh gae

hum wahi hain jo sar-e-dar hua karte the