haqiqat hai ise manen na manen ghaTti baDhti hain

haqīqat hai ise māneñ na māneñ ghaTtī baḌhtī haiñ

vo jhūTī hoñ ki sachchī dāstāneñ ghaTtī baḌhtī haiñ

kisī pahlū se koī tiir aa kar chaaT jā.egā

hazāroñ zāviye haiñ aur kamāneñ ghaTtī baḌhtī haiñ

falak-gīrī kī ḳhvāhish bāl-o-par ko raakh kar degī

havas-rāno parindoñ kī uḌāneñ ghaTtī baḌhtī haiñ

shikam-serī ne dastar-ḳhvān bichhvā.e haiñ logoñ se

mazāq-e-zā.iqa samho zabāneñ ghaTtī baḌhtī haiñ

bulandī aur pastī kā koī me.aar tai kar lo

zamīñ tañg ho rahī hai aur chaTāneñ ghaTtī baḌhtī haiñ

maiñ in chāñdī ke bāzāroñ pe apne daañt kyā gāḌūñ

chamaktī phīkī paḌtī sab dokāneñ ghaTtī baḌhtī haiñ

'sharar' maiñ aisī miTTī par asās-e-fan nahīñ rakhtā

rasānoñ kā bharosa kyā rasāneñ ghaTtī baḌhtī haiñ

haqiqat hai ise manen na manen ghaTti baDhti hain

wo jhuTi hon ki sachchi dastanen ghaTti baDhti hain

kisi pahlu se koi tir aa kar chaT jaega

hazaron zawiye hain aur kamanen ghaTti baDhti hain

falak-giri ki KHwahish baal-o-par ko rakh kar degi

hawas-rano parindon ki uDanen ghaTti baDhti hain

shikam-seri ne dastar-KHwan bichhwae hain logon se

mazaq-e-zaiqa samho zabanen ghaTti baDhti hain

bulandi aur pasti ka koi mear tai kar lo

zamin tang ho rahi hai aur chaTanen ghaTti baDhti hain

main in chandi ke bazaron pe apne dant kya gaDun

chamakti phiki paDti sab dokanen ghaTti baDhti hain

'sharar' main aisi miTTi par asas-e-fan nahin rakhta

rasanon ka bharosa kya rasanen ghaTti baDhti hain