haqiqat ke ab tak parastar hain hum

haqīqat ke ab tak parastār haiñ ham

jo biktā nahīñ aisā aḳhbār haiñ ham

hamārā fasāna haqīqat pe mabnī

mukammal mohabbat kā kirdār haiñ ham

agar hausla dil kā niklā nahīñ ho

ḳhudā kī qasam ab bhī tayyār haiñ ham

abhī tak jidhar se na guzrā ho koī

usī rah-guzar ke talabgār haiñ ham

zamāne ne kyā kyā fasāne banā.e

bas ik lafz un ke gunahgār haiñ ham

vo kis haal meñ hogā ham kis se pūchheñ

ḳhud apne masā.il se do-chār haiñ ham

jo haiñ dostoñ ke liye nik.hat-e-gul

to dushman ke siine pe talvār haiñ ham

abhī ham ne hathiyār Daale nahīñ haiñ

abhī tak qabīle ke sardār haiñ ham

'atīq' apnī ḳhuddāriyāñ roktī haiñ

ḳhud apne hī raste kī dīvār haiñ ham

haqiqat ke ab tak parastar hain hum

jo bikta nahin aisa aKHbar hain hum

hamara fasana haqiqat pe mabni

mukammal mohabbat ka kirdar hain hum

agar hausla dil ka nikla nahin ho

KHuda ki qasam ab bhi tayyar hain hum

abhi tak jidhar se na guzra ho koi

usi rah-guzar ke talabgar hain hum

zamane ne kya kya fasane banae

bas ek lafz un ke gunahgar hain hum

wo kis haal mein hoga hum kis se puchhen

KHud apne masail se do-chaar hain hum

jo hain doston ke liye nikhat-e-gul

to dushman ke sine pe talwar hain hum

abhi hum ne hathiyar Dale nahin hain

abhi tak qabile ke sardar hain hum

'atiq' apni KHuddariyan rokti hain

KHud apne hi raste ki diwar hain hum