haqiqat ko ajab andaz se jhuThlaya jata hai

haqīqat ko ajab andāz se jhuThlāyā jaatā hai

zamāne ko ḳhudā ke naam par bahkāyā jaatā hai

ta.alluq rahnumā kā muflis-o-nādār se kaisā

unheñ voToñ kī ḳhātir vaqt par phuslāya jaatā hai

kahīñ merī sharāfat ko na kamzorī samajh baiThe

kabhī dushman ko bhī is vāste dhamkāyā jaatā hai

agarche har na.e din kā nayā andāz hai lekin

kabhī afsāna-e-pārīna bhī dohrāyā jaatā hai

agar jazbāt zaḳhmī hoñ to hogā fikr bhī zaḳhmī

yahī tārīḳh ke aurāq meñ bhī paayā jaatā hai

ye rutba har kisī ko kū-e-jānāñ meñ nahīñ miltā

koī mansūr ho to daar par laTkāyā jaatā hai

haqiqat ko ajab andaz se jhuThlaya jata hai

zamane ko KHuda ke nam par bahkaya jata hai

talluq rahnuma ka muflis-o-nadar se kaisa

unhen woTon ki KHatir waqt par phuslaya jata hai

kahin meri sharafat ko na kamzori samajh baiThe

kabhi dushman ko bhi is waste dhamkaya jata hai

agarche har nae din ka naya andaz hai lekin

kabhi afsana-e-parina bhi dohraya jata hai

agar jazbaat zaKHmi hon to hoga fikr bhi zaKHmi

yahi tariKH ke auraq mein bhi paya jata hai

ye rutba har kisi ko ku-e-jaanan mein nahin milta

koi mansur ho to dar par laTkaya jata hai