haqiqat mein majazi ishq ka yun rang bharta hun

haqīqat meñ majāzī ishq kā yuuñ rang bhartā huuñ

ḳhudā kā naam le le kar butoñ kī chaah kartā huuñ

hasīñ milte nahīñ phir bhī havas milne kī kartā huuñ

ye qadr-e-zindagī kartā huuñ nā-qadroñ pe martā huuñ

vufūr-e-zof meñ kyā ḳhaak āh-e-sard bhartā huuñ

kalejā thaam letā huuñ to koī baat kartā huuñ

talāsh-e-dil meñ jab maiñ kū-e-jānāñ se guzartā huuñ

to ik ik zarre ko jhuk jhuk ke lākhoñ sajde kartā tuuñ

karo bhī imtihāñ merā abhī sar nazr kartā huuñ

Darāo aur ko tum maiñ kahāñ marne se Dartā huuñ

bulātā huuñ kabhī un ko talab un ko jo kartā huuñ

to kahte haiñ abhī aatā huuñ bantā huuñ sañvartā huuñ

tumhīñ jāñcho tumhīñ dekho tumhīñ socho tumhīñ samjho

mukarte ho qasam khā khā ke tum yā maiñ mukartā huuñ

bharosā kyā sabāt-e-zindagī kā bahr-e-hastī meñ

habāboñ kī tarah maiñ TūTtā huuñ jab ubhartā huuñ

asar lutf-o-ġhazab meñ tere aisā hai ki har āshiq

kabhī kahtā hai jiitā huuñ kabhī kahtā hai martā huuñ

nazar aatā hai ik parde meñ jalva donoñ aalam kā

mai-e-vahdat se jām-e-ma.arifat ko apne bhartā huuñ

tujhe pā.ūñ to sar par rakkhūñ āñkhoñ par biThā.ūñ maiñ

tasavvur meñ yahī baiThā ḳhayālī naqsh bhartā huuñ

na maiñ ne kuchh kahā tum se na tum ne kuchh kahā ham se

yahī hasrat liye maiñ aaj duniyā se guzartā huuñ

agar baa.is koī marne kā hotā to na ġham hotā

magar afsos is kā hai ki maiñ be-maut martā huuñ

nahīñ kuchh pursish-e-mahshar kā ġham haañ un se khaTkā hai

qayāmat se nahīñ Dartā tirī chāloñ se Dartā huuñ

ma.āl-e-kār par ishq-o-mohabbat meñ nazar kaisī

jo kuchh karnā mujhe hotā hai us ko kar guzartā huuñ

samajhtā huuñ ki jiite jī huā firdaus meñ dāḳhil

tire kūche meñ chalte phirte jab aa kar Thahartā huuñ

liyā sayyād se Dar kar jo qasd uḌne kā bulbul ne

kahā dast-e-muqaddar ne Thahar maiñ par katartā huuñ

ma.āl-e-ishq ai 'hāmid' jo kuchh honā thā hotā hai

butoñ ke jabr sahtā huuñ ḳhudā kā shukr kartā huuñ

haqiqat mein majazi ishq ka yun rang bharta hun

KHuda ka nam le le kar buton ki chah karta hun

hasin milte nahin phir bhi hawas milne ki karta hun

ye qadr-e-zindagi karta hun na-qadron pe marta hun

wufur-e-zof mein kya KHak aah-e-sard bharta hun

kaleja tham leta hun to koi baat karta hun

talash-e-dil mein jab main ku-e-jaanan se guzarta hun

to ek ek zarre ko jhuk jhuk ke lakhon sajde karta tun

karo bhi imtihan mera abhi sar nazr karta hun

Darao aur ko tum main kahan marne se Darta hun

bulata hun kabhi un ko talab un ko jo karta hun

to kahte hain abhi aata hun banta hun sanwarta hun

tumhin jaancho tumhin dekho tumhin socho tumhin samjho

mukarte ho qasam kha kha ke tum ya main mukarta hun

bharosa kya sabaat-e-zindagi ka bahr-e-hasti mein

hababon ki tarah main TuTta hun jab ubharta hun

asar lutf-o-ghazab mein tere aisa hai ki har aashiq

kabhi kahta hai jita hun kabhi kahta hai marta hun

nazar aata hai ek parde mein jalwa donon aalam ka

mai-e-wahdat se jam-e-marifat ko apne bharta hun

tujhe paun to sar par rakkhun aankhon par biThaun main

tasawwur mein yahi baiTha KHayali naqsh bharta hun

na main ne kuchh kaha tum se na tum ne kuchh kaha hum se

yahi hasrat liye main aaj duniya se guzarta hun

agar bais koi marne ka hota to na gham hota

magar afsos is ka hai ki main be-maut marta hun

nahin kuchh pursish-e-mahshar ka gham han un se khaTka hai

qayamat se nahin Darta teri chaalon se Darta hun

maal-e-kar par ishq-o-mohabbat mein nazar kaisi

jo kuchh karna mujhe hota hai us ko kar guzarta hun

samajhta hun ki jite ji hua firdaus mein daKHil

tere kuche mein chalte phirte jab aa kar Thaharta hun

liya sayyaad se Dar kar jo qasd uDne ka bulbul ne

kaha dast-e-muqaddar ne Thahar main par katarta hun

maal-e-ishq ai 'hamid' jo kuchh hona tha hota hai

buton ke jabr sahta hun KHuda ka shukr karta hun