haqiqat to ye hai yawar agar taqdir hoti hai

haqīqat to ye hai yāvar agar taqdīr hotī hai

to har mushkil meñ paidā ik na ik tadbīr hotī hai

nikaltī hai jo dil se aah vo iksīr hotī hai

duā-e-sub.h-gāhī meñ ajab tāsīr hotī hai

shab-e-va.ada tire aane meñ jab tāḳhīr hotī hai

hamārī har nazar ik yaas kī tasvīr hotī hai

hameñ kyoñ manā kartā hai tū vaa.iz but-parastī se

sanam-ḳhāne hī meñ ka.abe kī bhī ta.amīr hotī hai

kisī kī shān-e-rahmat kah ga.ī merī nadāmat se

jo bande haiñ unhīñ se asl meñ taqsīr hotī hai

sharīk-e-shām-e-tanhā.ī nahīñ hotā agar koī

mirī āñkhoñ meñ tū dil meñ tirī tasvīr hotī hai

ḳhatā.eñ hotī rahtī haiñ nazar-andāz ġhairoñ kī

mirī har be-gunāhī qābil-e-tāzīr hotī hai

faqat hai dasht-paimā.ī se matlab chārāgar ham ko

kahīñ ham vahshiyoñ ke paañv meñ zanjīr hotī hai

atā kar aise naale jo tire dar tak pahuñch jaa.eñ

hameñ vo aah de jis aah meñ tāsīr hotī hai

mirī mayyat kā naqsha khīñchne do mere madfan meñ

yahī to zindagī kī āḳhirī tasvīr hotī hai

hamārī aañkh laa.e tāb-e-jalva kis tarah 'mehdī'

nazar uThtī hai jo vo chādar-e-tanvīr hotī hai

haqiqat to ye hai yawar agar taqdir hoti hai

to har mushkil mein paida ek na ek tadbir hoti hai

nikalti hai jo dil se aah wo iksir hoti hai

dua-e-subh-gahi mein ajab tasir hoti hai

shab-e-wada tere aane mein jab taKHir hoti hai

hamari har nazar ek yas ki taswir hoti hai

hamein kyon mana karta hai tu waiz but-parasti se

sanam-KHane hi mein kabe ki bhi tamir hoti hai

kisi ki shan-e-rahmat kah gai meri nadamat se

jo bande hain unhin se asl mein taqsir hoti hai

sharik-e-sham-e-tanhai nahin hota agar koi

meri aankhon mein tu dil mein teri taswir hoti hai

KHataen hoti rahti hain nazar-andaz ghairon ki

meri har be-gunahi qabil-e-tazir hoti hai

faqat hai dasht-paimai se matlab chaaragar hum ko

kahin hum wahshiyon ke panw mein zanjir hoti hai

ata kar aise nale jo tere dar tak pahunch jaen

hamein wo aah de jis aah mein tasir hoti hai

meri mayyat ka naqsha khinchne do mere madfan mein

yahi to zindagi ki aaKHiri taswir hoti hai

hamari aankh lae tab-e-jalwa kis tarah 'mehdi'

nazar uThti hai jo wo chadar-e-tanwir hoti hai