haqiqaton ke mumasil majaz karta nahin

haqīqatoñ ke mumāsil majāz kartā nahīñ

maiñ be-javāz kabhī e'tirāz kartā nahīñ

mujhe ḳhabar hai muqaddar ke isti.āre kī

maiñ apne dast-e-talab ko darāz kartā nahīñ

har ek ġhair se kahtā hai vasf saare mire

magar vo shaḳhs ki ḳhud mujh pe naaz kartā nahīñ

kuchh aise lafz haiñ jo lauh-e-dil pe likhtā huuñ

har ek sher supurd-e-bayāz kartā nahīñ

ik aa.ina sā mire rū-ba-rū jo rahtā hai

maiñ rāzdār se rāz-o-niyāz kartā nahīñ

jo dil na chāhe to jhuktī nahīñ jabīñ merī

gunāhgār huuñ rashk-e-namāz kartā nahīñ

shab-e-siyāh ko 'safdar' shab-e-siyāh kahā

maiñ be-lihāz ḳhud apnā lihāz kartā nahīñ

haqiqaton ke mumasil majaz karta nahin

main be-jawaz kabhi e'tiraaz karta nahin

mujhe KHabar hai muqaddar ke istiare ki

main apne dast-e-talab ko daraaz karta nahin

har ek ghair se kahta hai wasf sare mere

magar wo shaKHs ki KHud mujh pe naz karta nahin

kuchh aise lafz hain jo lauh-e-dil pe likhta hun

har ek sher supurd-e-bayaz karta nahin

ek aaina sa mere ru-ba-ru jo rahta hai

main raazdar se raaz-o-niyaz karta nahin

jo dil na chahe to jhukti nahin jabin meri

gunahgar hun rashk-e-namaz karta nahin

shab-e-siyah ko 'safdar' shab-e-siyah kaha

main be-lihaz KHud apna lihaz karta nahin