haqiqaton ko fasana nahin banati main

haqīqatoñ ko fasāna nahīñ banātī maiñ

tumhāre ḳhvāb se ḳhud ko nahīñ jagātī maiñ

vo fāḳhta kī alāmat agar samajh jaatā

to us ke sāmne talvār kyuuñ uThātī maiñ

janāb vāqa.ī maiñ ne kahīñ nahīñ jaanā

vagarna aap kī gaaḌī meñ baiTh jaatī maiñ

phir ek-dam mire pairoñ meñ gir ga.e kuchh log

qarīb thā ki koī faisla sunātī maiñ

ḳhudā kā shukr ki vo rāste se lauT gayā

agar vo aatā to us ko kahāñ biThātī maiñ

kisī ḳhayāl meñ hāthoñ se chhūT jaate haiñ

ye jān-būjh ke bartan nahīñ girātī maiñ

vo dil ho yā mirī guḌiyā kī maut ho jo ho

hamesha sog meñ chūlhā nahīñ jalātī maiñ

maiñ māntī huuñ mirā faisla ġhalat niklā

tumhīñ batāo ki pahle kise bachātī maiñ

mirā badan kisī titlī se kam nahīñ 'zahrā'

to mar na jaatī agar tere haath aatī maiñ

haqiqaton ko fasana nahin banati main

tumhaare KHwab se KHud ko nahin jagati main

wo faKHta ki alamat agar samajh jata

to us ke samne talwar kyun uThati main

janab waqai main ne kahin nahin jaana

wagarna aap ki gaDi mein baiTh jati main

phir ek-dam mere pairon mein gir gae kuchh log

qarib tha ki koi faisla sunati main

KHuda ka shukr ki wo raste se lauT gaya

agar wo aata to us ko kahan biThati main

kisi KHayal mein hathon se chhuT jate hain

ye jaan-bujh ke bartan nahin giraati main

wo dil ho ya meri guDiya ki maut ho jo ho

hamesha sog mein chulha nahin jalati main

main manti hun mera faisla ghalat nikla

tumhin batao ki pahle kise bachati main

mera badan kisi titli se kam nahin 'zahra'

to mar na jati agar tere hath aati main