حقیقتوں میں غم ذات کر کے دیکھتے ہیں

حقیقتوں میں غم ذات کر کے دیکھتے ہیں

خدا سے اب تو مناجات کر کے دیکھتے ہیں

گمان چھوڑ کے حالات کے سنورنے کا

یقین گردش حالات کر کے دیکھتے ہیں

ملا نہ کچھ بھی بہت نفرتوں کو دیکھ لیا

محبتوں کی بھی برسات کر کے دیکھتے ہیں

یہی کہ ترک تعلق کی وہ سزا دیں گے

یہ بات ہے تو چلو بات کر کے دیکھتے ہیں

اک انتظار میں جیسے گزر گیا دن تو

دیے جلاؤ کہ اب رات کر کے دیکھتے ہیں

کسی سے نازؔ کبھی حال دل کہا تو نہیں

بیاں کچھ آج تو جذبات کر کے دیکھتے ہیں