haqiqaton se nazar kis liye churaata hai

haqīqatoñ se nazar kis liye churātā hai

agar ye sach hai ki tū aa.ina banātā hai

samundaroñ kī tahoñ ko khañgālne vaalā

kabhī kabhī lab-e-dariyā hī Duub jaatā hai

parind dil kā ab āzādiyoñ kī hasrat meñ

qafas kī tīliyāñ aahoñ se bhī jalātā hai

jise bhī rāsta manzil kā maiñ dikhātī huuñ

na jaane kyoñ vo mire naqsh-e-pā miTātā hai

junūñ ke saa.e meñ umreñ guzārne vaalā

rah-e-hayāt meñ kuchh naqsh chhoḌ jaatā hai

vo āñdhiyoñ se bhalā kyā laḌegā ai 'resham'

jo shaḳhs bād-e-sabā se bhī ḳhauf khātā hai

haqiqaton se nazar kis liye churaata hai

agar ye sach hai ki tu aaina banata hai

samundaron ki tahon ko khangalne wala

kabhi kabhi lab-e-dariya hi Dub jata hai

parind dil ka ab aazadiyon ki hasrat mein

qafas ki tiliyan aahon se bhi jalata hai

jise bhi rasta manzil ka main dikhati hun

na jaane kyon wo mere naqsh-e-pa miTata hai

junun ke sae mein umren guzarne wala

rah-e-hayat mein kuchh naqsh chhoD jata hai

wo aandhiyon se bhala kya laDega ai 'resham'

jo shaKHs baad-e-saba se bhi KHauf khata hai