haqir zarra bhi koh-e-giran dikhai de

haqīr zarra bhī koh-e-girāñ dikhā.ī de

kabhī kabhī ye zamīñ āsmāñ dikhā.ī de

jo merī aañkh se aañsū ravāñ dikhā.ī de

to Dūbtā huā saarā jahāñ dikhā.ī de

har ek shaḳhs yahāñ bad-gumāñ dikhā.ī de

mirā ḳhulūs mujhe rā.egāñ dikhā.ī de

zamīñ pe ḳhuun kī sargoshiyāñ ubhartī haiñ

makīñ to koī nahīñ hai makāñ dikhā.ī de

sulagtī ret pe chalte raho kahīñ na kahīñ

ajab nahīñ ki koī sā.ebāñ dikhā.ī de

mire ḳhulūs kī garmī bhī kaam aa na sakī

dabīz barf meñ chehra kahāñ dikhā.ī de

jo bahr-e-vahm meñ Duube hue se rahte haiñ

unheñ yaqīñ kā jazīra kahāñ dikhā.ī de

'nasīm' apnī kahānī kise sunāoge

koī na shahr meñ ab rāzdāñ dikhā.ī de

haqir zarra bhi koh-e-giran dikhai de

kabhi kabhi ye zamin aasman dikhai de

jo meri aankh se aansu rawan dikhai de

to Dubta hua sara jahan dikhai de

har ek shaKHs yahan bad-guman dikhai de

mera KHulus mujhe raegan dikhai de

zamin pe KHun ki sargoshiyan ubharti hain

makin to koi nahin hai makan dikhai de

sulagti ret pe chalte raho kahin na kahin

ajab nahin ki koi saeban dikhai de

mere KHulus ki garmi bhi kaam aa na saki

dabiz barf mein chehra kahan dikhai de

jo bahr-e-wahm mein Dube hue se rahte hain

unhen yaqin ka jazira kahan dikhai de

'nasim' apni kahani kise sunaoge

koi na shahr mein ab raazdan dikhai de