har aadmi ne tah-e-dil se di dua tujhko

har aadmī ne tah-e-dil se dī duā tujh ko

tamām shahr se phir bhī rahā gila tujh ko

burī lage to lage is meñ kyā ḳhatā merī

jo baat kahnī thī kah dī vo barmalā tujh ko

na jaane kaun sī us meñ thī maslahat pinhāñ

ki sach bhī kahne se aane lagī hayā tujh ko

abhī to zulm ko ik fan samajh rahā hai magar

kabhī to zulm kī degā ḳhudā sazā tujh ko

tū band rahtā hai din raat apne kamre meñ

to raas aa.egī kyā shahr kī fazā tujh ko

tū kor-zauq hai koī payām le na sakā

pukārtī rahī gulshan meñ yuuñ sabā tujh ko

'kamāl' par tū sitam Dhā rahā hai barsoñ se

magar vo aaj bhī kahtā hai bā-vafā tujh ko

har aadmi ne tah-e-dil se di dua tujh ko

tamam shahr se phir bhi raha gila tujh ko

buri lage to lage is mein kya KHata meri

jo baat kahni thi kah di wo barmala tujh ko

na jaane kaun si us mein thi maslahat pinhan

ki sach bhi kahne se aane lagi haya tujh ko

abhi to zulm ko ek fan samajh raha hai magar

kabhi to zulm ki dega KHuda saza tujh ko

tu band rahta hai din raat apne kamre mein

to ras aaegi kya shahr ki faza tujh ko

tu kor-zauq hai koi payam le na saka

pukarti rahi gulshan mein yun saba tujh ko

'kamal' par tu sitam Dha raha hai barson se

magar wo aaj bhi kahta hai ba-wafa tujh ko