har aaine mein hain mera dildar aur main

har aa.ine meñ haiñ mirā dildār aur maiñ

chāroñ taraf hai 'aks-e-ruḳh-e-yār aur maiñ

is mā'bad-e-vujūd meñ rahte haiñ saath saath

merī tarah kā ek gunahgār aur maiñ

ghar ke mu'āmalāt pe har raat der tak

karte haiñ guftugū dar-o-dīvār aur maiñ

ai zindagī-navīs mirī sarguzasht meñ

kyoñ haiñ alag alag mirā kirdār aur maiñ

mumkin nahīñ hai koī ta'alluq ho be-ġharaz

ye bahs kar rahe haiñ mirā yaar aur maiñ

laate ga.e tavāf ke phailāv meñ kamī

markaz ko DhūñDhte hue parkār aur maiñ

aatā nahīñ samajh ki bane dost kis tarah

'āsim' mire 'adū kā taraf-dār aur maiñ

har aaine mein hain mera dildar aur main

chaaron taraf hai 'aks-e-ruKH-e-yar aur main

is ma'bad-e-wujud mein rahte hain sath sath

meri tarah ka ek gunahgar aur main

ghar ke mu'amalat pe har raat der tak

karte hain guftugu dar-o-diwar aur main

ai zindagi-nawis meri sarguzasht mein

kyon hain alag alag mera kirdar aur main

mumkin nahin hai koi ta'alluq ho be-gharaz

ye bahs kar rahe hain mera yar aur main

late gae tawaf ke phailaw mein kami

markaz ko DhunDhte hue parkar aur main

aata nahin samajh ki bane dost kis tarah

'asim' mere 'adu ka taraf-dar aur main