ہر آئنے میں ہیں مرا دل دار اور میں

ہر آئنے میں ہیں مرا دل دار اور میں

چاروں طرف ہے عکس رخ یار اور میں

اس معبد وجود میں رہتے ہیں ساتھ ساتھ

میری طرح کا ایک گنہ گار اور میں

گھر کے معاملات پہ ہر رات دیر تک

کرتے ہیں گفتگو در و دیوار اور میں

اے زندگی نویس مری سرگزشت میں

کیوں ہیں الگ الگ مرا کردار اور میں

ممکن نہیں ہے کوئی تعلق ہو بے غرض

یہ بحث کر رہے ہیں مرا یار اور میں

لاتے گئے طواف کے پھیلاؤ میں کمی

مرکز کو ڈھونڈھتے ہوئے پرکار اور میں

آتا نہیں سمجھ کہ بنے دوست کس طرح

عاصمؔ مرے عدو کا طرفدار اور میں