har aan nai shan hai har lamha naya hai

har aan na.ī shaan hai har lamha nayā hai

ā.īna-e-ayyām hai yā terī adā hai

rahbar jise hairat se khaḌā dekh rahā hai

vo rahrav-e-gum-gashta kā naqsh-e-kaf-e-pā hai

nāloñ ne ye bulbul ke baḌā kaam kiyā hai

ab ātish-e-gul hī se chaman jalne lagā hai

ai jān-e-vafā dil ke evaz dard liyā hai

kuchh soch samajh kar hī to ye kaam kiyā hai

pahroñ pas-e-dīvār khaḌā thā so khaḌā hai

dīvāna hai pāband-e-rah-e-rasm-o-vafā hai

tanhā.ī meñ mahsūs huā hai mujhe aksar

jaise mire andar se koī bol rahā hai

taarī hai sukūt aaj samundar kī fazā par

gahrā.ī meñ shāyad koī tūfān uThā hai

kartā thā jo ḳhāmoshī kī talqīn hamesha

ham-sāya mirā ḳhvāb meñ vo chīḳh rahā hai

zindāñ ke darīchoñ se hai phir shauq ne jhāñkā

shāyad ki junūñ-ḳhez gulistāñ kī havā hai

ye gardish-e-ayyām kā ehsān hai 'tarzī'

ab zaḳhm-e-kuhan apnā harā hone lagā hai

har aan nai shan hai har lamha naya hai

aaina-e-ayyam hai ya teri ada hai

rahbar jise hairat se khaDa dekh raha hai

wo rahraw-e-gum-gashta ka naqsh-e-kaf-e-pa hai

nalon ne ye bulbul ke baDa kaam kiya hai

ab aatish-e-gul hi se chaman jalne laga hai

ai jaan-e-wafa dil ke ewaz dard liya hai

kuchh soch samajh kar hi to ye kaam kiya hai

pahron pas-e-diwar khaDa tha so khaDa hai

diwana hai paband-e-rah-e-rasm-o-wafa hai

tanhai mein mahsus hua hai mujhe aksar

jaise mere andar se koi bol raha hai

tari hai sukut aaj samundar ki faza par

gahrai mein shayad koi tufan uTha hai

karta tha jo KHamoshi ki talqin hamesha

ham-saya mera KHwab mein wo chiKH raha hai

zindan ke darichon se hai phir shauq ne jhanka

shayad ki junun-KHez gulistan ki hawa hai

ye gardish-e-ayyam ka ehsan hai 'tarzi'

ab zaKHm-e-kuhan apna hara hone laga hai