har aan rah-e-shauq mein chalne ki lagan hai

har aan rah-e-shauq meñ chalne kī lagan hai

har gaam vahī silsila-e-dār-o-rasan hai

āhista guzar bād-e-sabā us kī galī se

sunte haiñ ki us shoḳh kā phūloñ sā badan hai

us baaġh ke ḳhāroñ se bharā hai mirā dāman

jis baaġh ke phūloñ meñ bhī ḳhāroñ sī chubhan hai

allāh re har saañs kī ghaTtī huī qīmat

is daur ke insān kā jī lenā bhī fan hai

palkoñ pe haiñ TuuTe hue ḳhvāboñ ke janāze

aur ruuh pe ehsās ke zaḳhmoñ kī jalan hai

ghabrā ke tumhīñ chīḳh paḌo sard chaTāno

is dard ke sahrā meñ to sadiyoñ kī ghuTan hai

zindāñ meñ asīroñ kā ajab haal hai 'shā.ir'

bas vird-e-zabāñ sahn-e-chaman sahn-e-chaman hai

har aan rah-e-shauq mein chalne ki lagan hai

har gam wahi silsila-e-dar-o-rasan hai

aahista guzar baad-e-saba us ki gali se

sunte hain ki us shoKH ka phulon sa badan hai

us bagh ke KHaron se bhara hai mera daman

jis bagh ke phulon mein bhi KHaron si chubhan hai

allah re har sans ki ghaTti hui qimat

is daur ke insan ka ji lena bhi fan hai

palkon pe hain TuTe hue KHwabon ke janaze

aur ruh pe ehsas ke zaKHmon ki jalan hai

ghabra ke tumhin chiKH paDo sard chaTano

is dard ke sahra mein to sadiyon ki ghuTan hai

zindan mein asiron ka ajab haal hai 'shair'

bas wird-e-zaban sahn-e-chaman sahn-e-chaman hai