ہر بات پر جہاں میں اچھالیں گے نام لوگ

ہر بات پر جہاں میں اچھالیں گے نام لوگ

رسوا کریں گے اور بگاڑیں گے کام لوگ

بھاتا ہے کوئی کوئی ہی دل اور دماغ کو

ملنے کو یوں تو ملتے ہیں جگ میں تمام لوگ

کر کے دکھاؤ کام کوئی زیست میں بڑا

چاہت ہے گر جہاں میں کریں احترام لوگ

سکھ چین بھی نصیب میں ان کے لکھا ہے یا

دکھ درد بس جہاں میں اٹھائیں گے عام لوگ

رہتی ہے جس کی سب سے شکایت جہان میں

کرتے ہیں خود بھی کام وہی صبح و شام لوگ

آئی سمجھ میں بات ہمیں یہ نہ آج تک

کیوں کر کسی نشہ کے ہیں بنتے غلام لوگ

جگ میں بدی کی راہ پہ چلتے ہیں جو بشر

کرتے ہیں دور سے ہی انہیں رام رام لوگ

ہیراؔ ڈرو گے سب سے اگر بات بات پر

جینا کریں گے اور جہاں میں حرام لوگ