har badalte hue manzar mein raho

har badalte hue manzar meñ raho

na.ī uljhan na.e chakkar meñ raho

rābta ghar se rahe bāhar kā

kisī rauzan kī tarah ghar meñ raho

rāt-bhar sair karo duniyā kī

rāt-bhar apne hī bistar meñ raho

hādso dil meñ basā luuñ tum ko

sāneho aao mire ghar meñ raho

har-nafas daftar-e-ehsās likho

har ghaḌī arsa-e-mahshar meñ raho

husn saḌkoñ kā tamāshā Thahrā

dosto dīda-varo ghar meñ raho

kyā qayāmat hai ki tum ġhair ke saath

mere hī ghar ke barābar meñ raho

ghar ke hangāmoñ se fursat pā kar

baam par aao kabhī dar meñ raho

har badalte hue manzar mein raho

nai uljhan nae chakkar mein raho

rabta ghar se rahe bahar ka

kisi rauzan ki tarah ghar mein raho

raat-bhar sair karo duniya ki

raat-bhar apne hi bistar mein raho

hadso dil mein basa lun tum ko

saneho aao mere ghar mein raho

har-nafas daftar-e-ehsas likho

har ghaDi arsa-e-mahshar mein raho

husn saDkon ka tamasha Thahra

dosto dida-waro ghar mein raho

kya qayamat hai ki tum ghair ke sath

mere hi ghar ke barabar mein raho

ghar ke hangamon se fursat pa kar

baam par aao kabhi dar mein raho