har bulbul-e-mushtaq tah-e-dam hai ab bhi

har bulbul-e-mushtāq tah-e-dām hai ab bhī

phūloñ kī talab bā.is-e-ālām hai ab bhī

ik umr se go rasm-e-junūñ chhoḌ chukā hai

dīvāna tire shahr meñ badnām hai ab bhī

kahne ko to har samt bahāroñ kā samāñ hai

dil apnā to afsurda sar-e-shām hai ab bhī

muddat se kiye baiThe haiñ go tark-e-mohabbat

haañ bā.is-e-taskīn vahī naam hai ab bhī

kis aañkh se nazzāra kareñ lāla-o-gul kā

taqdīs-e-nazar bā.is-e-ilzām hai ab bhī

kuchh tujh ko ḳhabar hai bhī use bhūlne vaale

'betāb' ke hoñToñ pe tirā naam hai ab bhī

har bulbul-e-mushtaq tah-e-dam hai ab bhi

phulon ki talab bais-e-alam hai ab bhi

ek umr se go rasm-e-junun chhoD chuka hai

diwana tere shahr mein badnam hai ab bhi

kahne ko to har samt bahaaron ka saman hai

dil apna to afsurda sar-e-sham hai ab bhi

muddat se kiye baiThe hain go tark-e-mohabbat

han bais-e-taskin wahi nam hai ab bhi

kis aankh se nazzara karen lala-o-gul ka

taqdis-e-nazar bais-e-ilzam hai ab bhi

kuchh tujh ko KHabar hai bhi use bhulne wale

'betab' ke honTon pe tera nam hai ab bhi